L-Ewwel tas-Sena fil-Lombarija u l-Veneto: 29 ta' Diċembru - 3 ta' Jannar

2 hours ago
4 min read

Verona – Bergamo – Mantova – Padova – Milan

It-Tlieta 29 ta’ Diċembru – Malta – Milan – Verona

Il-ġitanti jiltaqgħu mat-tour leader fl-ajruport internazzjonali ta’ Malta għaċ-check-in. It-titjira tal-KM Malta Airlines KM624 twassalna fl-ajruport ta’ Milan Linate fis-2.25pm. Malli naslu, coach privat iwassalna lejn Verona, fejn se tkun qed tospitana l-Hotel Italia.

Wara l-wasla fil-lukanda, jitqassmu l-kmamar u jingħata ftit ħin liberu sabiex wieħed ikun jista’ jistrieħ wara l-vjaġġ. Aktar tard, flimkien mat-tour leader, ikollna l-ewwel opportunità nagħtu ħarsa lejn iċ-ċentru storiku ta’ Verona u nibdew induqu l-atmosfera partikolari ta’ din il-belt sabiħa.

Nagħtu ħarsa lejn Piazza Bra u l-imponenti Arena di Verona, wieħed mill-aktar amfiteatri Rumani magħrufa fid-dinja, kif ukoll lejn Via Mazzini u l-inħawi taċ-ċentru storiku. Wara, jingħata ħin liberu sabiex wieħed ikun jista’ jgawdi l-belt u jiekol liberament.

L-Erbgħa 30 ta’ Diċembru – Bergamo

Wara l-breakfast, coach privat iwassalna lejn Bergamo, waħda mill-aktar bliet pittoreski tal-Lombardija, magħrufa għaż-żewġ partijiet tagħha, il-Città Alta u l-Città Bassa.

Flimkien mat-tour leader, nitilgħu lejn il-Città Alta, iċ-ċentru storiku tal-belt imdawwar bis-swar Venezjani. Inżuru Piazza Vecchia, il-pjazza ewlenija tal-belt antika, kif ukoll il-Basilica di Santa Maria Maggiore, waħda mill-aktar binjiet importanti ta’ Bergamo, u l-Cappella Colleoni, magħrufa għall-faċċata elaborata tagħha.

Inkomplu lejn il-Duomo di Bergamo u l-Campanone, it-torri ċiviku li jiddomina ċ-ċentru storiku, filwaqt li ngawdu wkoll il-karattru partikolari tat-toroq dojoq u l-binjiet storiċi tal-Città Alta.

Wara li jinghata hin liberu, ninzlu wkoll f’Citta’ Bassa, fejn jinghata wkoll hin liberu fid-diversi hwienet li jinsabu f’din iz-zona.

Aktar tard, nirritornaw lejn Verona f’ħin opportun sabiex wieħed ikun jista’ jkompli jgawdi l-lejla.

Il-Ħamis 31 ta’ Diċembru – Verona

Il-ġurnata tal-lum hija ddedikata lil Verona, waħda mill-isbaħ bliet tal-Italja u belt magħrufa mad-dinja kollha għall-istorja, l-arkitettura u r-rabta tagħha mal-istorja ta’ Romeo u Gulietta.

Flimkien mat-tour leader, inżuru l-aktar postijiet ta’ interess fiċ-ċentru storiku, fosthom Piazza Bra, fejn tinsab l-Arena di Verona, kif ukoll Piazza delle Erbe, waħda mill-aktar pjazez karatteristiċi tal-belt, imdawra b’palazzi storiċi u binjiet eleganti.

Inkomplu lejn Piazza dei Signori, il-Cortile del Mercato Vecchio u l-Arche Scaligere, il-monumenti funerarji elaborati tal-familja Della Scala. Nagħtu wkoll ħarsa lejn il-Casa di Giulietta, marbuta mat-tradizzjoni ta’ Romeo u Juliet, kif ukoll lejn il-Ponte Pietra u d-Duomo di Verona.

Wara ż-żjara organizzata, jingħata ħin liberu sabiex wieħed ikun jista’ jgawdi Verona, jagħmel shopping u jiekol liberament.

Filgħaxija, ikollna l-opportunità niċċelebraw flimkien il-wasla tas-sena l-ġdida fil-qalba ta’ Verona permezz ta’ cena flimkien (prezz mhux inkluz), f’atmosfera festiva partikolari li tkun qed toffri l-belt għall-okkażjoni, fejn aktar tard nattendu ghall-ispettaklu maghruf mal-Ewropa kollha ‘Tutti in Piazza’ fejn inkunu nistghu nilqghu l-ewwel tas-sena.

Il-Ġimgħa 1 ta’ Jannar – Mantova

Wara l-breakfast, u wara ċ-ċelebrazzjonijiet tal-lejl ta’ qabel, nitilqu minn Verona għall-eskursjoni tagħna f’Mantova. It-tluq mill-lukanda jkun għall-ħabta tal-10.30am.

Mantova hija waħda mill-aktar bliet interessanti tal-Lombardija, magħrufa għall-wirt artistiku u arkitettoniku tagħha u għar-rabta qawwija tagħha mal-familja Gonzaga.

Flimkien mat-tour leader, inżuru Piazza Sordello, il-qalba storika tal-belt, fejn jinsab il-maestuż Palazzo Ducale, wieħed mill-aktar kumplessi palazzjali importanti tal-Italja. Inkomplu lejn il-Castello di San Giorgio, magħruf fost l-oħrajn għall-famuża Camera degli Sposi, imżejna minn Andrea Mantegna.

Nagħtu wkoll ħarsa lejn il-Duomo di Mantova, Piazza delle Erbe u l-Basilica di Sant’Andrea, waħda mill-kapulavuri arkitettoniċi ta’ Leon Battista Alberti. Inkomplu lejn ir-Rotonda di San Lorenzo, waħda mill-eqdem knejjes ta’ Mantova.

Jingħata ħin liberu sabiex wieħed ikun jista’ jgawdi l-belt, jagħmel shopping u jiekol liberament. Aktar tard, nirritornaw lejn Verona.

Is-Sibt 2 ta’ Jannar – Padova

Wara l-breakfast, coach privat iwassalna lejn Padova, waħda mill-aktar bliet importanti tar-reġjun tal-Veneto, magħrufa għall-istorja twila tagħha, l-università antika u l-wirt artistiku u reliġjuż tagħha.

Flimkien mat-tour leader, inżuru Prato della Valle, waħda mill-akbar pjazez tal-Italja, imdawra b’ringiela impressjonanti ta’ statwi u kanali. Inkomplu lejn il-Basilica di Sant’Antonio, waħda mill-aktar binjiet importanti tal-belt u destinazzjoni magħrufa għall-qima ta’ Sant’Antnin ta’ Padova.

Inżuru wkoll Piazza delle Erbe, Piazza della Frutta u Piazza dei Signori, kif ukoll il-Palazzo della Ragione, wieħed mill-aktar binjiet storiċi importanti taċ-ċentru tal-belt. Nagħtu wkoll ħarsa lejn l-inħawi tal-Università ta’ Padova, waħda mill-eqdem universitajiet fid-dinja.

Wara, jingħata ħin liberu sabiex wieħed ikun jista’ jkompli jiskopri Padova, jagħmel shopping u jgawdi l-atmosfera tal-belt. Aktar tard, nirritornaw lejn Verona f’ħin opportun.

Il-Ħadd 3 ta’ Jannar – Milan – Malta

Wara l-breakfast, inħallu Verona u nitilqu lejn Milan, fejn inqattgħu l-aħħar parti tal-vjaġġ tagħna qabel it-tluq lejn Malta.

Malli naslu fiċ-ċentru ta’ Milan, flimkien mat-tour leader nagħtu ħarsa lejn uħud mill-aktar postijiet ta’ interess tal-belt. Inżuru Piazza del Duomo, fejn tinsab il-maestuża Duomo di Milano, waħda mill-aktar katidrali magħrufa fid-dinja, kif ukoll il-famuża Galleria Vittorio Emanuele II, waħda mill-isbaħ galleriji storiċi tal-Ewropa.

Inkomplu lejn Piazza della Scala u t-Teatro alla Scala, wieħed mill-aktar teatri tal-opra prestiġjużi fid-dinja.

Aktar tard, coach privat iwassalna lejn l-ajruport ta’ Milan Linate sabiex naqbdu t-titjira tal-KM Malta Airlines KM625 lejn Malta, li titlaq fit-3.15pm.